25 mijë vende të reja pune nga investimi i Amazon në Evropë

Kompania amerikane Amazon ka njoftuar një plan të ri investimi prej më shumë se 10 miliardë eurosh për zgjerimin dhe modernizimin e rrjetit të saj të magazinave dhe shpërndarjes në mbarë Evropën.

Njoftimi u bë në aktivitetin “Delivering the Future” në Londër. Amazon theksoi se vetëm gjatë vitit 2025 investoi mbi 60 miliardë euro në Evropë, shifra më e lartë vjetore e kompanisë.

Një pjesë e investimit të ri do të shkojë për robotë dhe sisteme automatizimi në qendrat logjistike. Sipas kompanisë, këto teknologji do të kryejnë punët më të rënda fizike, duke u dhënë punonjësve mundësinë të fokusohen në detyra të tjera.

Mes risive të prezantuara është edhe një version i ri i robotit autonom Proteus, i cili do të jetë në gjendje të kuptojë dhe zbatojë udhëzime të dhëna nga punonjësit në gjuhë të zakonshme.

Amazon parashikon që ky program investimesh të krijojë rreth 25 mijë vende të reja pune në Evropë në vitet e ardhshme. Paralelisht, kompania do të investojë 860 milionë euro për trajnimin dhe kualifikimin e punonjësve deri në vitin 2030, në fusha si siguria kibernetike, zhvillimi i softuerëve, logjistika, energjia e rinovueshme dhe mekatronika.

Njoftimi vjen në një periudhë kur Evropa po përpiqet të forcojë pozicionin e saj në garën globale për inteligjencën artificiale dhe robotikën, përballë zhvillimeve të shpejta në Amerikë dhe Kinë.