30 vite pas vdekjes së Dianas, zbulohet projekti i Princit Harry për nënën e tij

Princ Harry thuhet se ka nisur të kontaktojë miq të vjetër të Princeshë Dianës, në kuadër të një projekti filmik që pritet t’i kushtohet jetës dhe trashëgimisë së nënës së tij.

Lajmi është bërë i ditur nga Richard Kay, redaktor i lartë dhe njohës i familjes mbretërore britanike, i cili pretendon se Harry po punon për një film televiziv mbi Princeshë Dianën.

Sipas Kay, Harry ka kontaktuar disa prej njerëzve që e kanë njohur nga afër Dianën, duke u kërkuar të kontribuojnë në projekt.

“Një nga arsyet pse Harry ndodhet këtu është për të realizuar një film televiziv, filmin për nënën e tij. E di që ai ka kontaktuar miqtë e saj dhe persona të tjerë që e kanë njohur, duke u kërkuar të marrin pjesë”, tha Kay në emisionin Palace Confidential.

Ai shtoi se ky projekt mund të zërë një pjesë të madhe të vëmendjes së princit gjatë vitit të ardhshëm.

Viti 2027 do të shënojë 30-vjetorin e vdekjes tragjike të Princeshë Dianës në Paris dhe pritet të shoqërohet me një sërë aktivitetesh dhe përkujtimesh.

Sipas ekspertit mbretëror, rikthimi i figurës së Dianës në qendër të vëmendjes mund të krijojë edhe më shumë tension mes dy djemve të saj, William dhe Harry.

“Diana ka dominuar mendimet e William dhe Harry-t gjatë dhjetë viteve të fundit”, u shpreh Kay.

Ai kujtoi se dokumentarët e realizuar nga dy vëllezërit për 20-vjetorin e vdekjes së Dianës ishin ndër momentet e fundit kur ata u shfaqën të bashkuar në mënyrë publike rreth trashëgimisë së nënës së tyre.

William dhe Harry besohet se kanë pasur shumë pak kontakte gjatë viteve të fundit. Ata u panë së bashku për herë të fundit në publik gjatë kurorëzimit të mbretit Charles III, në maj 2023.