“3D” në RTSH, Arapi: Samiti i Barcelonës, një aleancë kundër sjelljes agresive të Trump

Eksperti i marrëdhënieve ndërkombëtare, Florian Arapi, gjatë një analize në emisionin “3D” në RTSH, ku u diskutua tema “Rama midis Trump dhe Soros” u shpreh se qëndrimet e kryeministrit Edi Rama në arenën ndërkombëtare dhe rreshtimi i tij i fundit përkrah liderëve të së majtës globale, kërkojnë një lexim të kujdesshëm gjeopolitik.

Arapi theksoi se Edi Rama nuk udhëhiqet nga parime të palëkundura, por nga interesat e momentit, duke sjellë në vëmendje përplasjet e tij Trump në të shkuarën.

Në analizën e tij, eksperti theksoi se idealja në politikë është qëndrueshmëria parimore, një tipar që, sipas tij, i mungon kryeministrit shqiptar.

“Një politikan i drejtë është ai i cili qëndron me parimin, pavarësisht se kush është përballë. Në rastin e Ramës, ne kemi një politikan që u thotë ‘po’ gjithçkaje, qofshin ato të kaheve më të kundërta,” deklaroi Arapi gjatë panelit.

“Është gati të bëjë “kamikazin” në momente të caktuara për një krah, siç e bëri për shembull në vitin 2016 në fushatën elektorale kundër Trumpit, në favor të Hillary Clinton,”.

Sipas tij, pjesëmarrja e fundit e Edi Ramës në samitin e familjes socialiste dhe liberale nuk ishte thjesht një takim rutinor ideologjik. Arapi vuri në dukje se gjeografia e pjesëmarrësve dhe udhëheqja e samitit zbulojnë një agjendë të qartë kundër politikës së jashtme të Trump.

“Ky samit duhet parë në një kuadër tjetër, më të gjerë. Është një lloj aleance kundër sjelljes ndryshe, të çuditshme apo agresive të Trumpit në marrëdhëniet ndërkombëtare, siç është lufta në Iran apo raportet me Venezuelën,” analizoi eksperti.

Roli i Spanjës dhe efekti domino në Evropë

Si iniciatorë kryesorë të këtij fronti, Arapi identifikoi kryeministrin spanjoll Pedro Sánchez dhe presidentin brazilian Lula da Silva, të cilët i cilësoi si “antagonistë shumë të mëdhenj të politikës së Trumpit”.

Për të ilustruar këtë përplasje, eksperti solli si shembull vendimet e forta të Madridit zyrtar në lidhje me Lindjen e Mesme dhe reagimin e Uashingtonit.

“Kryeministri spanjoll Sánchez ka ndërmarrë hapa shumë të ashpër në raport me luftën në Gaza. Në momentin që Spanja i bllokoi bazat dhe hapësirën ajrore Shteteve të Bashkuara—e cila u pasua në një efekt domino pothuajse në të gjithë shtetet e tjera të Evropës—Trumpi u tregua shumë i ashpër verbalisht dhe në sjelljet e tij ndaj kryeministrit Sánchez,” shpjegoi Arapi.