5 gola të pësuar, por Tah beson te përmbysja në kthim: Do të japim gjithçka, duam të jemi në finale

Bayern Munich pësoi humbje të ngushtë në ndeshjen e parë gjysmëfinale të Champions League ndaj PSG, të martën në mbrëmje, pas një spektakli me 9 gola në “Parc des Princes”. Pavarësisht humbjes 5-4, bavarezët treguan karakter të madh duke e lënë gjithçka të hapur për ndeshjen e kthimit në “Allianz Arena”, të mërkurën e ardhshme, më 6 maj.

“Ishte një ndeshje shumë, shumë intensive. Pavarësisht humbjes, mendoj se në shumë faza treguam çfarë lloj skuadre jemi. I menaxhuam mirë momentet e vështira, sepse nuk lejojmë që gjëra të tilla të na ndalin, thjesht vazhdojmë përpara. U pa që mund të shënojmë shumë gola. Sigurisht, pësuam shumë sonte, por në fund është vetëm diferenca prej një goli. Do të hyjmë në ndeshjen e kthimit me besim të plotë, do të japim gjithçka, sepse duam të jemi në finale”, – deklaroi Jonathan Tah.

Edhe Vincent Kompany, i cili do të rikthehet në stol pas pezullimit në ndeshjen e parë, u shfaq i sigurt: “Besimi është 100%, ashtu si edhe ndjesia. Na duhen tifozët tanë dhe mbështetja e tyre me të njëjtin pasion që kishim kundër Real Madridit”.