5 objektivat e Bayern për merkaton e verës. Një rikthim, dy emra të sprovuar dhe dy yje të rinj

Bayern Munich ka filluar që tani nga puna për të finalizuar lëvizjet që ka në plan për merkaton e verës. Bavarezët kanë një ekip të kompletuar, por që ka nevojë për disa ndërhyrje në disa pozicione.

Së pari, Bayern ka vendosur për rikthimin e Noel Aseko, mesfushorin difensiv i cili shëklqeu te Hannover 96 në këtë sezon. Rikthimi i 20-vjeçarit do t’i kushtojë Bayernit vetëm 1.4 milionë euro.

Anthony Gordon është objektivi kryesor i Bayern Munich për krahun e majtë, dhe sipas Talksport, anglezi ka rënë dakord për kushtet personale me klubin bavarez. Tani duhet gjetur gjuha e përbashkët me Newcastle. “Qymyrxhinjtë” e vlerësojnë Gordon mbi 75 milionë euro.

Dusan Vlahovic shihet si një mundësi e mirë për të forcuar sulmin, pasi Nicolas Jackson nuk ka bindur aspak dhe do të largohet në fund të sezonit. Sulmuesi serb shihet si një mundësi e mirë për të zëvendësuar Harry Kane, në rastet kur anglezi duhet të pushojë.

Përveç emrave të sprovuar si Gordon dhe Vlahovic, Bayern është i vëmendshëm edhe ndaj yjeve të rinj. I pari është Givairo Read, i cili ka zgjuar interesin e shumë klubeve të mëdha. Bayern është gati të paguajë 30 milionë euro për të finalizuar transferimin e mbrojtësit të djathtë 19-vjeçar.

Një tjetër emër i ri është edhe Kennet Eichhorn, mesfushori i Hertha Berlin. 16-vjeçari konsiderohet si një lojtar me të ardhshme të madhe dhe klauzola e tij e largimit është 12 milionë euro. Bayern nuk do që ta humbë këtë rast dhe është gati të paguajë klauzolën e tij.

Më pas mbetet për t’u parë nëse mesfushori do të huazohet diku tjetër për të fituar më shumë përvojë apo do të provohet direkt në ekipin e parë të bavarezëve.