8-mujori: Të ardhurat nga TAP llogariten rreth 19.554 milionë lekë
Të ardhurat nga tatimi mbi të ardhurat personale (TAP) gjatë tetë muajve të këtij viti llogariten rreth 19.554 milionë lekë, ose 61 % e planit për të realizuar përgjatë gjithë vitit, pas rishikimit me ulje të buxhetit, përmes një Akti Normativ të qeverisë.
Sipas treguesve fiskale paraprak të ministrisë së Financave, për vitin 2015, financat planifikojnë të mbledhin 31.803 milionë lekë ose 3.514 milionë lekë më pak se sa planiifikohej në fillim të vitit. Në planin fillestar të qeverisë të ardhurat nga TAP për vitin 2015 llogariteshin 35.317 milionë lekë.
Të ardhurat e mbledhura gjatë 8-mujorit të parë të vitit 2015 rezultojnë më të larta, krahasuar me 8-mujorin e vitit 2014. Referuar statistikave zyrtare të ministrisë së Financave, të ardhurat nga TAP gjatë periudhës janar-gusht 2014 llogariten 18.270 milionë lekë.
Të ardhurat personale që tatohen mund të kategorizohen në nëngrupe: TAP mbi të ardhurat nga paga në sektor publik dhe sektor privat; TAP nga interesat bankare; TAP nga dividendët; TAP nga shitja e pasurive të paluajtshme dhe TAP për burime të tjera të ardhurash. Të ardhurat që vijnë nga tatimi mbi pagat zënë peshën kryesore sa i takon strukturës së vlerave të tatimit të të ardhurave personale (TAP).
