“Adresa i përket një institucioni arsimor në Arabinë Saudite”- Kërcënimi me bombë në institucione, Policia zbulon au

Policia e Shtetit ka zbuluar adresën nga është dërguar e-maili kërcënues në institucionet shqiptare.

Policia thotë se origjina eshte nga një shkollë në Arabinë Saudite dhe po identifikojnë autorët. Por nuk saktëson numrin e institucioneve.

Njoftimi i Policisë:

“Policia e Shtetit informon se ditën e sotme është evidentuar një mesazh elektronik (email), i dërguar në disa adresa institucionesh, i cili përmban kërcënime për vendosjen e lëndëve shpërthyese dhe kryerjen e akteve terroriste.

Nga verifikimet paraprake rezulton se mesazhi është dërguar nga një adresë elektronike që i përket një institucioni arsimor në Arabinë Saudite.

Mënyra e dërgimit të këtij mesazhi paraqet ngjashmëri me raste të mëparshme, kur mesazhe të ngjashme kërcënuese janë dërguar nga adresa elektronike të komprometuara, që u përkisnin studentëve të institucioneve arsimore jashtë vendit.

Strukturat e Policisë së Shtetit po kryejnë verifikimet dhe veprimet e nevojshme hetimore për të përcaktuar origjinën dhe autenticitetin e mesazhit, për të zbardhur plotësisht rrethanat e rastit, si dhe për të identifikuar personat përgjegjës për dërgimin e tij”.