Alarm demografik, Singapori ofron deri në 50 mijë euro për çdo fëmijë të lindur

– Kryeministri i Singaporit, Lawrence Wong, ka njoftuar një paketë të re mbështetjeje për familjet me fëmijë, në përpjekje për të frenuar rënien e numrit të lindjeve dhe për të lehtësuar kostot e rritjes së fëmijëve, sipas medias italiane “Skytg24”.

Sipas paketës së re, çdo fëmijë në Singapor, mund të përfitojë deri në rreth 70 mijë dollarë singaporianë, ose afërsisht 50 mijë euro, në mbështetje të drejtpërdrejtë deri në moshën 17-vjeçare.

Paketa nis me një pagesë fillestare prej 10 mijë dollarësh për të porsalindurit.

Qeveria planifikon gjithashtu të rrisë ndjeshëm ditët e lejes së paguar, për kujdesin ndaj fëmijëve dhe të ulë në 150 dollarë singaporianë në muaj, tarifat për çerdhet me kohë të plotë që subvencionohen nga shteti.

Masat vijnë pasi norma e lindshmërisë në Singapor regjistroi një rënie rekord prej 0,87 fëmijësh për grua vitin e kaluar.

Qeveria ka ngritur një grup pune për rishikimin e politikave mbi martesën dhe prindërimin dhe planifikon të shpenzojë rreth 7 miliardë dollarë singaporianë për masat, në mbështetje të familjeve gjatë vitit financiar aktual.

Problemi është bërë edhe më urgjent për shkak të plakjes së popullsisë.

Singapori pritet të klasifikohet këtë vit si një “shoqëri super e plakur”, ku të paktën një në pesë banorë është 65 vjeç ose më shumë. /