Albana Koçiu: Raportet ndërkombëtare nuk duhen lexuar me fragmente, Shqipëria më afër Europës se kurrë

Në seancën plenare të Kuvendit, zëvendëskryeministrja Albana Koçiu theksoi se debati mbi raportet ndërkombëtare duhet të shërbejë për sqarimin e të vërtetës dhe jo për përdorim politik.

“Raportet ndërkombëtare lexohen me fragmente, nxirren nga konteksti dhe interpretohen sipas interesit. Në fund krijohet ideja sikur Shqipëria është një vend pa arritje, pa progres dhe pa të ardhme,” u shpreh Koçiu.

Ajo nënvizoi se integrimi europian nuk lidhet me interesat e një partie apo qeverie, por me të ardhmen strategjike të vendit: *“Nuk flasim për fatin e një partie politike, nuk flasim as për interesin e një qeverie, por flasim për drejtimin historik të Shqipërisë, për vendin ku duam të jetojnë fëmijët tanë, për standardin europian që shqiptarët e kanë zgjedhur prej kohësh.”*

Koçiu solli në vëmendje progresin e Shqipërisë në procesin e integrimit: *“Kapitujt janë hapur, grupkapitujt po ecin me ritëm. Institucionet europiane flasin për mundësinë reale të mbylljes së negociatave brenda vitit 2027. Sot flitet për një Shqipëri që ka bërë histori suksesi në rajon.”*

Zv.kryeministrja theksoi se raportet ndërkombëtare kërkojnë më shumë rezultate, por njëkohësisht evidentojnë progresin e vendit: *“Reforma në drejtësi ka sjellë rezultate konkrete, partnerët ndërkombëtarë e konsiderojnë sot Shqipërinë një aleat të besueshëm.”*

Duke iu referuar raportit të Parlamentit Europian, Koçiu tha: *“Progresi i mëtejshëm i Shqipërisë do të varet nga aftësia për të kapërcyer polarizimin politik dhe për ta ngritur kulturën demokratike të debatit publik. Europa pret që ne të sillemi si shtet serioz.”*

Ajo solli edhe të dhëna nga raporti i Departamentit Amerikan të Shtetit për klimën e investimeve: *“Raporti nënvizon hapjen e gjashtë grupkapitujve, rritjen ekonomike prej 4%, uljen e inflacionit nga 6,7% në vitin 2022 në 2,2% në vitin 2024, si dhe reduktimin e borxhit kombëtar nga 75% në 55%. Shqipëria shënoi rekordin historik të investimeve të huaja direkte, 1,71 miliardë euro në vitin 2024.”*

Në përfundim, Koçiu theksoi: *“E vërteta është që Shqipëria sot është më e fortë se dje, më e respektuar se dje, më afër Europës se kurrë më parë. Rruga europiane nuk është thjesht objektiv politik, është zgjedhje historike e shqiptarëve.”*

Debati në Kuvend u fokusua tek raportet ndërkombëtare, procesi i integrimit europian dhe klima e investimeve, duke nxjerrë në pah mesazhin e Koçiut për transparencë dhe përgjegjësi politike.