Allegri nuk do të shkojë i vetëm te Napoli, kërkon të marrë me vete dy lojtarë të Milanit

Max Allegri kërkon të përfitojë nga situata kaotike që ka mbërthyer Milanin dhe dëshiron që të marrë me vete te Napoli, dy nga lojtarët e kuqezinjve.

Mediet italiane zbulojnë se Allegri i ka kërkuar presidentit të Napolit, Aurelio De Laurentiis, transferimin e Alexis Saelemaekers dhe të Adrien Rabiot, dy lojtarë të rëndësishëm në sezonin e fundit për skemat dhe sistemin e lojës të 58-vjeçarit.

Ende nuk flitet për shifra dhe detaje të tjera ekonomike, por e ardhmja e dy lojtarëve në fjalë do të varet nga mënyra si do të zgjidhet situata aktuale te kuqezinjtë.

Saelemaekers është nën kontratë me kuqezinjtë deri në vitin 2031. Vlera e tij në treg llogaritet 20 milionë euro. Rabiot është nën kontratë deri në vitin 2028. Vlera në treg e mesfushorit francez llogaritet te 20 milionë euro po ashtu.