Ambasada e SHBA-ve feston “4 korrikun”, ditën e Pavarësisë, Lu eviton fjalët për “Drejtësinë”

Ambasada e Shteteve të Bashkuara të Amerikës në Tiranë nën kujdesin e kryediplomatit Donald Lu organizoi një festë në Pallatin e Brigadave me rastin e “4 korrikut”, Festës së Pavarësisë.

Pjesë e kësaj feste ishin politikanë, diplomatë, njerëz të medias, ndërsa ajo që ra në sy ishte veshja casual e ambasadorit Lu.

Në fjalën e shkurtër Donald Lu u fokusua tek përpjekjet prej amerikani të babit të tij, ish emigrant nga Kina, ndërsa ndoshta për herë të parë mbas shumë kohësh zgjodhi të mos flasë asnjë fjalë për reformën në Drejtësi.

“Disa nga ju e dinë se këtë vit humba babanë tim. Ai nuk ishte i lindur amerikan por ai zgjodhi të bëhej amerikan për të ndërtuar  një jetë më të mirë komunitetin e tij. Në vitin 1960 ai u nis në një udhëtim të vështirë 28 ditor me anije përmes oqeanit Paqësor drejt SHBA. Ai kishte me vete vetëm 2 mijë dollar për të studiuar në Universitetin e Oklahomas. Në vend që t’i përdorte paratë për blerë gjëra praktike ushqim, veshje dhe libra ai e përdori pjesën më të madhe për të blerë një BMË të përdorur. Gjatë ditës studionte inxhinieri dhe gjatë natës punonte si barist.

Kur i mbaruan paratë shkoi në Los Angelos, ku gjeti punë në një kompani inxhinierike përfundimisht kompania sponsorizoi që ai të merrte Green Card. Ai kurseu mjaftueshëm para për të sjellë vëllezërit, motrën dhe nënë e tij në SHBA.

Imë atë pati një karrierë të gjatë si inxhinier, ai nuk qe kurrë i pasur por u afrohej fëmijëve  të tij mundësi që vetë nuk i kishte pasur kurrë, ai pati një jetë me aventura  dhe gjithmonë krenar që ishte amerikan”, tha Donald Lu.

Edhe Prokurori shqiptaro-amerikan Xhon Junçaj përcolli një mesazh për politikën shqiptare duke sjellë në vëmendje shembuj nga jeta e tij.

“Sot festojmë pavarësinë e një vendi të madh. Si e masim madhështinë e një vendi?  Babai dhe nëna im si shqiptarë do tju thoshin se në një vend te madh, me shumë punë dhe sakrificë, një mekanik dhe e shoqja pastruese, të dy me prejardhje shqiptare mund ti rrisin dhe ti japin shkollë 4 fëmijëve.

Në një vend të madh mund ti rrisin ata fëmijë, me vlerat tradicionale shqiptarë: “bukë e krypë dhe zemër të bardhë”. Në një vend të madh mund të festojnë jo vetëm domethënien e 4 Korrikut, por edhe 28 Nëntorin. Do ti thoshim se në një vend të madh, djali i prindërve emigrantë mund të bëhet prokuror, një prokuror që përpara gjykatave të huaja te deklaroje me krenari: Unë jam Xhon Juncaj dhe përfaqësoj popullin e Shteteve të Bashkuara të Amerikës. Heronjtë e Pavarësisë nuk nderohen me fishekzjarre që ndriçojnë qiellin, janë kalimtarë. Jo si amerikan krenar ju them se heronjtë e Pavarësisë nderohen kur mbahet premtimi i tyre, premtimi për mundësi të barabartë për çdo qytetar, të bëhet edhe në të ardhmen”, tha ai.