Ambasadorja e re e BE-së takim me ministrin Hoxha: Ruajtja e ritmit të reformave, thelbësore për anëtarësimin e Shqipërisë

Ambasadorja e re e Bashkimit Europian në Shqipëri, Sofia Moreira de Sousa, ka zhvilluar takimin e parë me Ministrin për Evropën dhe Punët e Jashtme, Ferit Hoxha, ku në fokus ishte procesi i integrimit europian të Shqipërisë.

Ambasadorja theksoi rëndësinë e vijimit të reformave dhe ruajtjes së ritmit të tyre për avancimin e vendit drejt anëtarësimit në BE.

“Ruajtja e ritmit të reformave lidhur me integrimin evropian është thelbësore për përparimin e Shqipërisë drejt BE-së”, u shpreh Moreira de Sousa.

Ajo nënvizoi se Bashkimi Europian do të vijojë të mbështesë Shqipërinë në të gjitha fazat e procesit të integrimit.

“Si Ambasadore e BE-së, jam këtu për ta mbështetur Shqipërinë në çdo hap të këtij rrugëtimi”, deklaroi ajo.

Gjatë takimit, ambasadorja shprehu gjithashtu solidaritetin e saj për situatën e krijuar nga zjarret e fundit në vend, duke bërë të ditur se BE-ja është e gatshme të ofrojë mbështetje në përballimin e emergjencave.

“BE-ja është e gatshme ta mbështesë Shqipërinë në përballimin e situatave të tilla”, tha ambasadorja.