Prokuroria e Beogradit zbardh akuzat ndaj Kriçakut dhe Sekuloviqit: ndalim deri në 48 orë, arrestimi s’ka lidhje me zgjedhjet

Prokuroria e Lartë Publike në Beograd ka zbardhur akuzat ndaj shefit të Drejtorisë së Policisë Kriminale (UKP), Marko Kriçak, dhe shefit të Shërbimit për Luftimin e Krimit, Boshko Sekuloviq, të arrestuar mëngjesin e sotëm në çështjen “Senjak”. Sipas deklaratës së Prokurorisë së Lartë Publike në Beograd, të cilën e përcjellin mediat serbe, kryeprokurori i saj, Nenad Stefanoviq, bëri të ditur se prokuroria dhe punonjësit e saj veprojnë vetëm në përputhje me Kushtetutën dhe ligjet e Serbisë dhe se arrestimi i sotëm nuk ka asnjë lidhje me proceset zgjedhore apo me rezultatet e zgjedhjeve parlamentare.

Sipas Stefanoviqit, prokuroria i kishte nisur veprimet parahetimore që në maj të këtij viti, kur ishte shfaqur pengimi i punës së prokurorëve që merren me çështjen. Në fund të korrikut, dosjes iu bashkua edhe kallëzimi penal i avokatëve të të dëmtuarit, hap që çoi në ndalimin e dy zyrtarëve të lartë policorë.

Sipas Prokurorisë së Lartë Publike, Kriçaku dhe Sekuloviqi dyshohen se nga 12 maji deri më 3 qershor 2026, si zyrtarë të Ministrisë së Punëve të Brendshme, duke tejkaluar dhe shfrytëzuar detyrën zyrtare dhe duke mos e kryer atë, i kanë shkaktuar dëm dhe i kanë shkelur rëndë të drejtat të dëmtuarit Veselin Miliq, ish-shef i policisë së Beogradit. Dyshimet lidhen me veprimet e ndërmarra lidhur me vrasjen në restorantin “27” në Senjak.

Dyshimet më konkrete rëndojnë mbi Kriçakun: më 16 maj, bashkë me policë të tjerë ende të paidentifikuar, në ambientet e UKP-së ai dyshohet se e ka keqtrajtuar dhe torturuar të dëmtuarin me inicialet N.L. Me kallëzimin penal, Kriçakut i vihen në barrë veprat penale “shpërdorim i detyrës zyrtare” dhe “keqtrajtim dhe torturë”, ndërsa Sekuloviqit vetëm vepra “shpërdorim i detyrës zyrtare”.

Me urdhër të prokurorit të çështjes, të dy të arrestuarve u është caktuar ndalimi deri në 48 orë. Brenda këtij afati, Kriçaku dhe Sekuloviqi do të sillen për t’u marrë në pyetje në Prokurorinë e Lartë Publike në Beograd.