ANALIZË – Netanyahu përballë sfidës së re: A do të arrijë opozita të krijojë shumicën parlamentare?

TEL AVIV, 28 tetor /ATSH-DPA/- Zgjedhjet parlamentare në Izrael nuk rezultuan me një fitues me shumicë të mjaftueshme për të qeverisur i vetëm.

Tani, partitë arabe mund të luajnë një rol vendimtar në përcaktimin nëse kryeministri Benjamin Netanyahu, do të qëndrojë në pushtet apo do të formohet një qeveri e re.

Asnjë nga dy kampet kryesore nuk siguroi shumicën.

Sipas rezultateve paraprake, me mbi 85% të votave të numëruara, kampi i Netanyahut parashikohej të merrte 53 vende në parlamentin izraelit, ndërsa opozita e drejtuar nga ish-shefi i ushtrisë Gadi Eisenkot, 48 vende.

Për të pasur shumicën nevojiten të paktën 61 nga 120 vendet.

Partitë arabe mund të ndryshojnë balancën e pushtetit.

Ato parashikohej të fitonin së bashku 19 vende.

Nëse bashkohen me kampin e Eisenkot, ky grupim do të kishte 67 vende, mjaftueshëm për të formuar shumicën parlamentare.

Megjithatë, disa parti të opozitës kanë kundërshtuar deri tani bashkëpunimin me partitë arabe.

Partitë arabe janë shprehur të gatshme të ndihmojnë në largimin e Netanyahut nga pushteti.

Yousef Jabareen, drejtues i aleancës “Lista e Përbashkët”, tha se partia e tij ishte e gatshme të ndihmonte në zëvendësimin e qeverisë aktuale.

Edhe Mansour Abbas, drejtues i partisë “Ra’am”, shprehu besimin se partitë arabe mund të ndihmojnë opozitën të sigurojë shumicën.

Brenda opozitës ka thirrje për bashkëpunim.

Yair Golan, drejtues i partisë së majtë “Demokratët”, u kërkoi partive opozitare të kapërcejnë kundërshtimet dhe të bashkëpunojnë me deputetët arabë, për të formuar një qeveri që përfaqëson të gjithë qytetarët e Izraelit.

Formimi i qeverisë mbetet i pasigurt. Sipas analistit politik Jonathan Rynhold, një mundësi është që partia “Ra’am” ta mbështesë një qeveri të pakicës të drejtuar nga Eisenkot, pa u bërë pjesë zyrtare e saj.

Por, qëndrimet e ndryshme të partive dhe mosmarrëveshjet për çështjet palestineze, mund ta bëjnë të vështirë një marrëveshje të qëndrueshme.

Çfarë ndodh nëse nuk formohet qeveria?

Nëse partitë nuk arrijnë marrëveshje, Izraeli mund të përballet me zgjedhje të reja dhe me një periudhë tjetër paqëndrueshmërie politike.

Netanyahu do të qëndronte kryeministër i përkohshëm deri në formimin e një qeverie të re ose zhvillimin e zgjedhjeve të tjera.

Presidenti izraelit, Isaac Herzog tha se duhet të bëhen të gjitha përpjekjet për të shmangur zgjedhje të reja.

Ai pritet të nisë konsultimet me partitë politike javën e ardhshme. /