Anije cisternë goditet nga projektil i paidentifikuar në Ngushticën e Hormuzit, njofton UKMTO

Një anije cisternë është goditur nga një projektil i paidentifikuar në Ngushticën e Hormuzit, njoftoi mbrëmjen e së martës agjencia britanike e operacioneve tregtare detare UKMTO, siç raporton Al Jazeera në mbulimin e saj të drejtpërdrejtë të luftës.

Sipas UKMTO-së, autoritetet po e hetojnë incidentin, ndërsa deri tani nuk janë dhënë detaje për dëmet, për gjendjen e ekuipazhit apo për autorin e mundshëm të goditjes.

Incidenti është më i fundit në një seri sulmesh ndaj anijeve tregtare brenda dhe rreth ngushticës gjatë ditëve të fundit, të cilat kanë ulur ndjeshëm qarkullimin e naftës përmes rrugës detare më të rëndësishme energjetike në botë.

Ngushtica e Hormuzit, përmes së cilës para luftës kalonte rreth një e pesta e tregtisë botërore të naftës dhe gazit të lëngshëm, mbetet në qendër të përplasjes mes Iranit dhe Shteteve të Bashkuara, ndërsa përpjekjet për një rregullim të përkohshëm të kalimit ende nuk kanë dhënë rezultat përfundimtar.