Anila Denaj në Kuvend: 2 miliardë lekë shtesë për blerjen e vaksinave kundër Covid-19
Denaj: Përtej procesit zgjedhor rindërtimi dhe vaksinimi ka vijuar me intensitet të lartë. Sapo është realizuar vaksinimi i më shumë se gjysmë milioni shqiptarë.
Vaksinimi do të vijojë të mbetet një nga prioritet e deklaruara të Qeverisë Shqiptare.
Rrjedhimisht, për të arritur imunizimin e të gjithë popullatës së vendit, objektivi ynë i përbashkët mbetet vaksinimi i 2.2 milionë qytetarëve shqiptarë, për të cilët nevojiten 4.4 milion doza vaksina. Ja përse në muajin prill, Qeveria ndërmori një proces për rishikimin e skenarëve të buxhetit të shtetit për vitin 2021.Kjo ishte vetëm përpjekja e radhës në angazhimin për të siguruar çdo financim të nevojshëm për vaksinimin e qytetarëve shqiptarë.
Deri më sot Qeveria Shqiptare ka nënshkruar kontrata për sigurimin e 2.2 milion dozave të vaksinave, doza të cilat janë në përdorim dhe në proces të vaksinimit të popullatës. Megjithatë, për përmbushjen e objektivit të imunizimit ndaj Covid-19 kërkohen dhe 2.2 milion doza të tjera vaksine. E përkthyer në vlerë monetare, bazuar në çmimet e vaksinave, kjo nënkupton një financim shtesë për 2 miliardë lekësh të dedikuar për blerjen e vaksinave. Ne Mbetemi përballë një situate pozitive për Shqipërinë, por dinamike.
Bazuar në vlerësimet mbi ecurinë e deritanishme të treguesve të buxhetit 2021, si edhe pritshmërinë e performancës së tyre deri në fund të vitit 2021, ky akt normativ përcakton vetëm një ndryshim kyç i cili ka të bëjë me shtesën me 2 miliardë lekë në Fondin Rezervë të Këshillit të Ministrave.
Me qëllim përballimin e shpenzimeve të blerjes së vaksinave gjatë vitit 2021, si edhe të shpenzimeve të tjera eventuale të qeverisë qe lidhen me pandeminë Covid 19.
