ANKARA – Trump: SHBA-ja “me shumë gjasa” do të godasë sërish Iranin sonte

ANKARA, 8 korrik /ATSH-DPA/- Presidenti i SHBA-së, Donald Trump, tha se ushtria amerikane “me shumë gjasa” do të kryejë një tjetër sulm ndaj Iranit, gjatë natës së sotme.

Deklarata vjen pasi përplasjet mes Iranit dhe SHBA-së u rikthyen gjatë natës, kur forcat amerikane goditën dhjetëra objektiva iraniane, në përgjigje të sulmeve ndaj anijeve cisternë në Ngushticën e Hormuzit. 

Uashingtoni gjithashtu riktheu sanksionet ndaj naftës iraniane.

Irani u kundërpërgjigj duke sulmuar objektiva ushtarake amerikane, në Bahrein dhe Kuvajt.

Fillimisht, Trump tha se mendonte se armëpushimi me Iranin ishte “mbyllur”, por më vonë deklaroi se SHBA-ja, me shumë gjasa, do ta godiste sërish fuqishëm, sonte.

Gjatë samitit të NATO-s, ku ishte i pranishëm edhe presidenti ukrainas, Volodymyr Zelensky, Trump tha se do t’i bënte Iranit “një paralajmërim të vogël” përpara se të urdhëronte sulmet e reja.

“Do t’i godasim fuqishëm sonte, por do të shohim se si do të zhvillohen gjërat”, tha Trump. /