Araghchi në Financial Times: Irani është gati për diplomaci, por edhe plotësisht i përgatitur të mbrohet

Irani është gati për diplomaci, por do të mbrohet nëse sulmohet, shkroi të mërkurën ministri i Jashtëm Abbas Araghchi në një artikull të botuar në Financial Times, siç njofton Reuters. “Ndërsa Irani është i përkushtuar fort për të kërkuar një zgjidhje paqësore dinjitoze të konfliktit, ne jemi gjithashtu plotësisht të përgatitur të mbrohemi”, shkroi Araghchi.

Sipas raportimit të Bloomberg për të njëjtin artikull, Araghchi tha se Irani është i përgatitur “t’i japë diplomacisë një shans tjetër nëse shohim prova të forta të një dëshire të sinqertë nga ana e SHBA-së për një zgjidhje të drejtë dhe dinjitoze për t’i dhënë fund përgjithmonë këtij konflikti”, duke i kërkuar Uashingtonit ta provojë vullnetin për paqe duke hequr bllokadën detare ndaj porteve iraniane.

Ministri iranian shtoi se Shtëpia e Bardhë nuk ka treguar asnjë vullnet për të arritur një mirëkuptim dhe se, në këto kushte, ka pak arsye për të pritur përparim në bisedime, siç raporton edhe Al Jazeera. Kanalet indirekte përmes Pakistanit dhe Katarit mbeten të hapura në letër, por pa ndonjë lëvizje konkrete nga asnjëra palë.

Shkrimi i Araghchi-t publikohet në një ditë kur sekretari amerikan i Shtetit, Marco Rubio, e quajti arritjen e një marrëveshjeje paqeje me Teheranin “jashtëzakonisht të vështirë” për sa kohë vazhdojnë sulmet ndaj anijeve tregtare në Ngushticën e Hormuzit, ndërsa Teherani këmbëngul se ngushtica do të qëndrojë e mbyllur derisa Uashingtoni të pranojë kushtet e tij.