Araghchi skeptik për marrëveshjen me SHBA: Kemi histori premtimesh të pa mbajtura dhe moszbatimi

Ministri i Jashtëm iranian, Abbas Araghchi tha se Teherani mbetet thellësisht skeptik ndaj angazhimit të Uashingtonit për çdo marrëveshje, edhe pse pranoi se një memorandum midis Iranit dhe Shteteve të Bashkuara mund të nënshkruhet të premten në Zvicër.

Araghchi tha se do të ketë një takim në Zvicër midis krerëve të delegacioneve iraniane dhe amerikane, gjatë të cilit do të nënshkruhet memorandumi, i ndjekur nga raundi i parë i negociatave pasuese.

“Ne kemi një histori premtimesh të pa mbajtura, moszbatimi dhe prishjeje të marrëveshjeve. Ne po planifikojmë si procesin e negociatave ashtu edhe zbatimin e çdo marrëveshjeje mbi bazën e mosbesimit, shkeljeve të angazhimeve të kaluara dhe përvojave të mëparshme”, tha ai.

Araghchi tha se mirëkuptimi mund të krijojë mundësi ekonomike për Iranin, por ai paralajmëroi kundër varësisë së ekonomisë së vendit nga çdo marrëveshje e arritur përmes negociatave me Uashingtonin.

Ai shtoi se Irani do të përpiqet të maksimizojë përfitimet ekonomike të çdo marrëveshjeje, duke shmangur mbështetjen e tepërt në të.

Mohammad Bagher Ghalibaf, kryetari i parlamentit iranian, pohoi gjithashtu të hënën në një postim në X se Irani ka bërë një hap të madh drejt fitores përfundimtare.

Ai u tha iranianëve se fitorja është arritur nëpërmjet rezistencës historike dhe trimërisë së forcave të armatosura iraniane.