Arrestohet në Selanik shtetasi turk i kërkuar nga Zvicra për trafik kokaine, rrjeti dyshohet për 21 tonë që nga 2019-a

Policia në Selanik arrestoi një shtetas turk 51-vjeçar, i kërkuar nga autoritetet zvicerane me një kërkesë ekstradimi, siç njofton Kathimerini. Ai dyshohet për pjesëmarrje në organizatë kriminale, trafik droge dhe pastrim parash, ndërsa emri i tij nuk është bërë publik.

Sipas dokumenteve të prokurorëve zviceranë, të cituara nga Kathimerini, 51-vjeçari dyshohet se iu bashkua në vitin 2019 një rrjeti kriminal që transportonte sasi të mëdha droge drejt tregjeve europiane. Që atëherë janë sekuestruar të paktën 21 tonë kokainë nga Amerika Latine, ndërsa dokumentet tregojnë se dërgesa të tjera mund të kenë kaluar pa u zbuluar.

Ekuadori identifikohet si vendi kryesor i origjinës së ngarkesave, sipas të njëjtit njoftim, ndërsa rrjeti dyshohet se vepronte në shkallë të gjerë, me dërgesa të përsëritura drejt Europës.

I arrestuari akuzohet gjithashtu për një rol mbështetës në organizata kriminale dhe për pastrimin e parave të drogës përmes një rrjeti kompanish, të cilat dyshohet se përdoreshin për të menaxhuar dhe për të fshehur fondet e paligjshme.

Gjatë arrestimit, policia sekuestroi dy telefona celularë që ndodheshin në posedim të tij. Pas arrestimit, ai u dërgua para prokurorit në Selanik, ku pritet të nisë procedura për shqyrtimin e kërkesës zvicerane për ekstradim.