Arrestohet shoferi i autobusit të “Niš ekspresit” pas aksidentit pranë Zagrebit

Policia e Zagrebit ka arrestuar shtetasin e Serbisë, 55 vjeç, i cili drejtonte autobusin e “Niš ekspresit” në aksidentin e rëndë në autostradën A3 pranë Ivanić-Gradit në Kroaci, siç njofton Newsmax Balkans. Ndaj shoferit do të ngrihet kallëzim penal për shkaktim aksidenti rrugor, pas së cilës ai do t’i dorëzohet mbikëqyrësit të paraburgimit, konfirmoi policia e Zagrebit.

Aksidenti ndodhi më 8 nëntor rreth orës 07:25, në kilometrin e 61-të të autostradës A3, mes nyjës Ivanić-Grad dhe pikës së pagesës Zagreb-lindje. Sipas rezultateve të hetimit, të cilat i publikoi policia dhe i përcjell Newsmax Balkans, shoferi i autobusit me targa të Serbisë nuk e mbajti automjetin brenda korsisë së shënuar të qarkullimit, por devijoi djathtas, kaloi korsinë e ndalimit në raste urgjence dhe doli nga rruga.

Autobusi pastaj goditi barrierën metalike mbrojtëse, vazhdoi të lëvizë pa kontroll dhe u përmbys. Këqyrjen e vendit të ngjarjes e kreu zëvendësi i Prokurorisë së Qarkut në Velika Gorica, në bashkëpunim me policinë e Zagrebit, raporton Newsmax Balkans.

Në aksident humbën jetën dy pasagjere: nxënësja 17-vjeçare e Shkollës së Arteve në Kralevë, V. P. nga Mali i Zi, e cila udhëtonte drejt Pragës me një nxënës tjetër të klasës së katërt dhe një mësues, siç njoftoi shkolla, dhe një grua 53-vjeçare nga Spliti që jetonte në Zagreb.

Pesë pasagjerë pësuan lëndime të rënda — katër shtetas të Serbisë dhe një shtetase e Kroacisë — ndërsa edhe 25 pasagjerë të tjerë u lënduan lehtë: 18 shtetas të Serbisë, tre të Kroacisë dhe nga një shtetas i Bjellorusisë, Rumanisë, Bosnjë-Hercegovinës dhe Hungarisë. Të gjithë të lënduarve iu dha ndihmë mjekësore në institucionet shëndetësore të zonës së Zagrebit, siç njofton Newsmax Balkans.