Arteta rikuperon dy lojtarë kyç: Dita nis me një lajm të mirë, do të kemi nevojë për të gjithë

Ka shenja pozitive tek Arsenal në prag të ndeshjes së tyre të dytë gjysmëfinale të Champions League sonte kundër Atletico Madrid në Londër. Trajneri Mikel Arteta do të jetë në gjendje të mbështetet te Martin Odegaard dhe Kai Havertz, të dy të disponueshëm.

Të dy munguan në seancën stërvitore të së hënës, duke nxitur disa dyshime, por vetë trajneri sqaroi situatën. Havertz është jashtë loje që nga dëmtimi i pësuar kundër Newcastle muajin e kaluar, ndërsa Odegaard humbi ndeshjen e fundit në Premier kundër Fulham pasi u lëndua me një muskul të kofshës në ndeshjen e parë.

Arteta theksoi rëndësinë e rikuperimit të tyre: “Ne kemi nevojë për opsione, kemi nevojë për mundësinë për të luajtur ndeshje të ndryshme sot, qoftë nga fillimi apo më pas. Kështu që, ky është një lajm vërtet i mirë për ne që i kemi të dy të disponueshëm përsëri“.

Jurrien Timber dhe Mikel Merino mbeten jashtë loje, të dy ende duke u përballur me lëndimet e tyre përkatëse. Megjithatë, rikthimi i dy lojtarëve kryesorë i ofron Arsenalit më shumë mundësi përpara një ndeshjeje vendimtare për fushatën evropiane të “topçinjve”.