ASD, 100 mln euro linjë financimi nga BERZH

 Agjencia e Sigurimit te Depozitave do të nënshkruajë javën e ardhshme marrëveshjen e financimit 100 milione euro nga Banka Evropiane për Rindertim dhe Zhvillim (BERZH).

Sipas nje njoftimi per shtyp nga BERZH, kjo shumë do të jetë në dispozicion të Agjencisë për t’u përdorur në çdo rast që paraqitet nevoja. Linja e kredisë do të garantohet nga qeveria shqiptare dhe do të bëhet efektive pasi garancia të ratifikohet në Kuvend.

Sigurimi i kësaj linje e rrit ndjeshëm vlerën e fondit të kompensimit të depozitave që disponon ASD.

Aktualisht, kjo vlerë është sa 3.4% e vlerës totale të depozitave të siguruara me ligj. Me marrjen e linjës së financimit nga BERZH, fondi i kompensimit në dispozicion të ASD rritet në rreth 6%. Vlerësohet se aktualisht kjo shkallë mbulimi është më e larta në Rajon. Sipas ligjit shqiptar, depozitat bankare të individëve janë të siguruara 100% deri në shumën 2.5 milionë lekë.

Me ndryshimet ligjore të miratuara në fillim të këtij viti, në skemën e sigurimit do të përfshihen edhe Shoqëritë e Kursim-Kreditit, për një vlerë sigurimi të plotë të depozitave deri në shumë 2 milionë lekë. Megjithatë, më parë SHKK-të duhet të përmbushin detyrimet që rrjedhin nga ligji dhe nga aktet nënligjore në zbatim të tij, duke pasur si afat fundin e vitit 2015.