AstraZeneca: Të dhënat e fundit konfirmojnë efektivitetin e lartë të vaksinës sonë

Kompania farmaceutike britaniko-suedeze AstraZeneca ka siguruar se të dhënat më të fundit të eksperimenteve tregojnë se vaksina e saj antiCovid-19 ka efektivitet shumë të lartë.

”Vaksina ka një vlerësim të efikasitetit prej 76% kundër Covid-19 simptomatik”, theksoi AstraZeneca në një deklaratë duke cituar të dhëna shtesë nga studimi i saj i fazës së tretë me rreth 32 500 subjekte të testit.

”Për njerëzit mbi 65 vjeç, vlerësimi i efektivitetit është 85%”, shtoi kompania.

”Kjo do të thotë që midis subjekteve të moshuar në një grup të vaksinuar, ndodhën 85% më pak raste të sëmundjes sesa ato në një grup kontrolli”, theksoi ajo.

AstraZeneca foli edhe për një efektivitet 100% kundër kësaj sëmundjeje për të gjithë ata në gjendje kritike apo të shtruar në spitale.

Prodhuesi i ilaçeve kishte premtuar të siguronte më shumë të dhëna pasi një agjenci shëndetësore amerikane ngriti pyetje në lidhje me rezultatet e studimeve të vaksinave “të papërditësuara”.