Balluku rekurs në Gjykatën e Lartë për pezullimin nga detyra

14 maj 2026 – Ish-numri dy i qeverisë, Belinda Balluku, ka paraqitur rekurs në Gjykatën e Lartë kundër masës së sigurisë ndaj saj “pezullim i ushtrimit të funksioneve publike”.

Së fundmi, Prokuroria e Posaçme Antikorrupsion ka zgjatur me 3 muaj afatet e hetimit për dosjen e Tunelit të Llogarasë. Ish-zv kryeministrja dyshohet për “shkelje të barazisë në tendera” tek kjo dosje, ndërsa ndodhet nën hetim për 7 lotet e Unazës së Madhe.

Zgjatja e hetimeve, iu është komunikuar edhe ish-vartësve të saj, Gentian Gjylit dhe Erald Elezit. SPAK ka argumentuar se shtyrja e afateve të hetimit, bëhet për shkak, se kryerja e ekspertizave në kuadër të hetimit merr kohë.

Më herët, Balluku kërkoi në Gjykatën e Lartë pezullimin e masës “ndalim i daljes jashtë vendit”, ankimim që u rrëzua. Më 9 mars, Gjykata e Posaçme e Apelit mbajti një seancë për masën tjetër, atë të “pezullimit nga detyra”.

Pavarësisht se Balluku nuk ushtron më asnjë funksion në pushtetin ekzekutiv, masa u la në fuqi.

Kujtojmë se më 12 mars të këtij viti, Parlamenti votoi kundër kërkesës së SPAK-ut për dhënien e autorizimit për arrestimin ose heqjen e lirisë për Ballukun.

Lajmi në përditësim…

/tvklan.al