Hallgrimsson flet për Kosovën: Irlanda synon vendin e dytë në grup

Përzgjedhësi i Irlandës, Heimir Hallgrimsson, ka folur për përballjen vendimtare me Kosovën në Ligën e Kombeve, duke deklaruar se Irlanda synon ta përfundojë kampanjën në vendin e dytë, pozitë që aktualisht mbahet nga Kosova, siç njofton Telegrafi.

Të dyja përfaqësueset kanë nga pesë pikë. Në krye të grupit gjendet Austria me tetë pikë, ndërsa Izraeli renditet i fundit me dy pikë. Irlanda fillimisht do të përballet me Austrinë në udhëtim më 14 nëntor, përpara se ta presë Kosovën në Dublin më 17 nëntor, në ndeshjen që mund të jetë vendimtare për renditjen përfundimtare.

Hallgrimsson ka pranuar se dy fitoret në këto përballje do t’i jepnin Irlandës mundësinë për ta mbyllur grupin në vendin e parë, por ka theksuar se edhe pozita e dytë mbetet një objektiv i rëndësishëm.

“Me dy fitore do të ishim të parët në grup, ndërsa me fitore ndaj Kosovës në stadiumin ‘Aviva’, me shumë gjasë do ta siguronim vendin e dytë, që padyshim se është synimi ynë, për të qenë në vazon e dytë kur të tërhiqet shorti për Evropian, në muajin dhjetor në Belfast”, ka deklaruar përzgjedhësi i Irlandës.

Kosova, ndërkohë, ka një avantazh psikologjik nga përballja e parë, e zhvilluar në Prishtinë, ku kishte triumfuar me rezultat 1:0. Heroi i asaj fitoreje ishte Vedat Muriqi, i cili realizoi golin vendimtar në minutën e 83-të.

Kështu, dueli i 17 nëntorit në Dublin pritet të ketë peshë të madhe në përcaktimin e pozitës së dytë në grup, me Kosovën që synon ta mbrojë vendin aktual dhe Irlandën që kërkon ta përmbysë renditjen në ndeshjen e fundit.