Programi për subvencionimin me 70% të shumës për çdo familje që do të instalojë panele diellore në banesë për ngrohjen e ujit, është një instrument tjetër që po zbaton qeveria për të përballuar krizën energjetike.
Zëvendëskryeministrja, njëherësh ministre e Infrastrukturës dhe Energjisë, Belinda Balluku informoi sot lidhur me programin për subvencionimin me 70 % të shumës për çdo familje që do të instalojë njësi diellore për ngrohjen e ujit.
Në një deklaratë për mediet pas mbledhjes së Këshillit të Ministrave, Balluku deklaroi se nga 1 tetori është çelur thirrja për subjektet që tregtojnë por edhe instalojnë panelet diellore.
Balluku tha se gara pranë Agjencisë së Eficencës së Energjisë do të jetë e hapur për subjektet deri më 18 tetor.
“Më 1 nëntor do të hapim aplikimet për 2000 familjet e para të interesuara, që duan të përfitojnë nga ky program”, tha ajo.
Balluku bëri të ditur se nga të dhënat rezulton se 20% e faturës mujore të një familjeje shkon për ngrohjen e ujit.
Sipas saj, kjo është faza e parë dhe synimi është që brenda vitit 2023 të jenë të instaluara mbi 20 mijë njësi për ngrohjen e ujit për abonentët, duke bërë të mundur uljen e kostos së çdo fature për familjarët, por edhe konsumin në përgjithësi, në kushtet e krizës energjetike.
Zv/kryeministrja Balluku bëri të ditur se në Taskforcën për energjinë do të jetë në terren për të siguruar se të gjithë hapat e planit për përballimin e krizës së energjisë do të përmbushen.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.