Barnat për humbje peshe rrezik më të ulët për fraktura te pacientët me diabet

Rreziku për fraktura të kockave mund të jetë më i ulët te personat me diabet të tipit 2 që trajtohen me medikamente GLP-1, si Ozempic. Një studim i ri tregon se këta pacientë kishin 21% më pak gjasa të pësonin fraktura, krahasuar me ata që përdornin një tjetër grup ilaçesh për diabetin, të njohura si DPP-4.

Studimi analizoi të dhënat shëndetësore të mbi 133 mijë personave, të moshës 50 deri në 90 vjeç, në Shtetet e Bashkuara, gjatë viteve 2015-2022. Rezultatet treguan se ulja më e madhe e rrezikut u vu re te frakturat e shtyllës kurrizore, me 32%, ndërsa frakturat e ijeve dhe femurit ishin 30% më të pakta.

Studiuesit theksojnë se ky efekt nuk u ndikua nga humbja në peshë apo nga ndryshimet e nivelit të sheqerit në gjak, çka lë të kuptohet se këto medikamente mund të kenë një ndikim të drejtpërdrejtë në shëndetin e kockave.

Megjithatë, ata nënvizojnë se studimi është vëzhgues dhe nuk provon se barnat GLP-1 mbrojnë kockat. Për këtë arsye, nevojiten prova klinike të mëtejshme për të konfirmuar nëse ky efekt mbrojtës është i vërtetë dhe afatgjatë.