Basha- Jahjaga: Komisioni për Demarkacionin do të nis punën shumë shpejt

Komisioni “ad-hoc” i iniciuar nga Presidentja e Kosovës, Atifete Jahjaga, për të analizuar procesin e Demarkacionit me Malin e Zi do të fillojë punën së shpejti.

Këtë e ka bërë të ditur vet presidentja Jahjga gjatë një takimi që ka pasur me kryetarin e Partisë Demokratike të Shqipërisë, Lulzim Basha.

Jahjga gjatë takimit me Bashën ka njoftuar atë për për zhvillimet e përgjithëshme në vend e më theks të veçantë ato në Kuvendin e Kosovës, si dhe për proceset tjera.

Po ashtu, ajo ka njoftuar Bashën për nismat e saj për të gjetur zgjidhje për dy marrëveshjet që po kundërshtohen nga Opozita, Asociacionin dhe Demarkacionin, thuhet në komunikatën e Presidencës.

“Presidentja Jahjaga e njoftoi z. Basha me nismat e saj për të gjetur zgjidhje për dy kërkesat e opozitës, që kanë të bëjnë më Asociacionin e Komunave Serbe të Kosovës dhe me procesin e shënjimit të kufirit shtetëror midis Republikës së Kosovës dhe asaj të Malit të Zi. Presidentja Jahjaga tha se vendimi i Gjykatës Kushtetuese është udhërrëfyes për qeverinë se si duhet të veprohet në raport me themelimin e Asociacionit të Komunave Serbe, ndërsa sa i përket demarkacionit, Presidentja Jahjaga  tha se shumë shpejt do të fillojë punën një komision i pavarur me ekspertët ndërkombëtarë i cili do ta analizojë gjithë procesin”, thuhet në komunikatë.

Jahjaga dhe Basha, biseduan edhe për dialogun midis Republikës së Kosovës dhe asaj të Serbisë. Presidentja nënvizoi rëndësinë e implementimit të marrëveshjeve të arritura në këtë proces dhe kërkoi që zbatimi i këtyre marrëveshjeve të jetë parakusht për procesin e integrimit të Serbisë në Bashkimin Evropian.

Kryetari i Partisë Demokratike të Shqipërisë, Lulzim Basha, shprehu mirënjohje dhe mbështetje për punën dhe rolin e jashtëzakonshëm që ka luajtur Presidentja Jahjaga si faktor i unitetit në Kosovë. Ai theksoi se Presidentja Jahjaga ka dëshmuar se ka qenë zgjidhja më e mirë për Kosovën dhe çmoi lart kontributin e saj për të ardhmen e Republikës së Kosovës, thuhet në komunikatë.