Basha-Veseli: Gazit lotsjellës dëmton imazhin dhe rrugën euro-atlantike të Kosovës

Kryetari i Kuvendit, Kadri Veseli, e ka pritur sot në Prishtinë, në takim të veçantë kreun e opozitës në Shqipëri, Lulzim Basha. Veseli thotë se në takim me kreun e PD’së, të dy kanë vlerësuar lartë bashkëpunimin mes dy shteteve shqiptare, shkruan Gazeta Express.

Në takimin mes Kadri Veselit dhe Lulzim Bashës, sipas të parit, u diskutua edhe hedhja e gazit lotsjellës në Kuvend nga opozita, që sipas të dyve “dëmton imazhin dhe rrugën euro-atlantike të Kosovës”.

“Në takim me kreun e Partisë Demokratike të Shqipërisë, Lulëzim Bashën, vlerësuam lartë bashkëpunimin e deri tashëm ndërmjet vendeve tona. Me pozitën dhe opozitën, partitë politike në Shqipëri, kemi pika vetëm përbashkuese.

Kemi synime të njëjta, agjendën euro integruese, shtetin ligjor dhe mirëqenien e qytetarëve tanë. Në takim, ishte qëndrim i përbashkët se lotsjellësi nuk është model veprimi opozitar në Parlament ngase dëmton imazhin dhe rrugën euro-atlantike të Kosovës”, ka shkruar Kryetari Veseli, në facebook.