Bastisje në mbi dhjetë lokacione në Shkup, Tetovë e Kumanovë: nën hetim ish-drejtori i Fondit të Shëndetësisë dhe drejtues të një spitali privat

Policia e Maqedonisë së Veriut po kryen që nga mëngjesi i sotëm bastisje në më shumë se dhjetë lokacione në Shkup, Tetovë dhe Kumanovë, në kuadër të një hetimi të gjerë për krim financiar në shëndetësi, siç njofton Trn.mk. Kontrollet po i zhvillon Departamenti për Krim të Organizuar pranë Byrosë për Siguri Publike, me fokus te flukset e dyshimta financiare mes Fondit të Sigurimit Shëndetësor dhe sektorit privat shëndetësor.

Nën hetim janë ish-funksionarë të Fondit dhe drejtues të një spitali privat. Sipas raportimeve të mediave, i pari i raportuar në këtë rast është ish-drejtori i Fondit, Den Donçev, ndërsa në listën e të raportuarve janë edhe një ish-kryetar i Bordit Drejtues të Fondit, drejtues të sektorëve të kontrollit dhe të njësisë rajonale të Shkupit, si dhe ish-drejtues e drejtues aktualë të spitalit. Sipas portalit Kurir, të cilit i referohet MKinformer, spitali nën hetim është “Sante” dhe hetimi përfshin gjithsej nëntë persona.

Dyshimet, siç njofton Trn.mk, lidhen me veprat penale keqpërdorim i pozitës dhe i autorizimit zyrtar, punë e pandërgjegjshme në shërbim, mashtrim dhe pastrim parash. Hetimi dyshon se përmes faturave fiktive ose të fryra janë nxjerrë para publike, ndërsa qytetarë të cenueshëm kanë paguar për shërbime që është dashur t’ua mbulojë sigurimi shëndetësor.

Sipas vlerësimeve të para jozyrtare, dëmi i drejtpërdrejtë ndaj buxhetit të shtetit tejkalon 1,5 milion euro, ndërsa përfitimi pasuror i kundërligjshëm i spitalit privat vlerësohet në rreth 4 milionë euro. Të dëmtuar dyshohet se janë edhe një numër i madh pacientësh që janë trajtuar në këtë spital.

Ministria e Punëve të Brendshme dhe prokuroria kompetente kanë paralajmëruar detaje zyrtare gjatë ditës, ndaj emrat dhe rolet e personave të përfshirë mbeten ende informacione jozyrtare, deri në konfirmimin e institucioneve.