Bayern me 122 gola në kampionat, por rekordi mbetet te… Torino!

Me fitoren 5-1 ndaj Këlnit, Bayern nuk e mbylli sezonin e Bundesligës vetëm me një tjetër festë golash. Përpara se të ngrinin trofeun para tifozëve të tyre në Allianz Arena, djemtë e Kompany thyen gjithashtu rekordin për golat e shënuar në një sezon midis pesë ekipeve më të mira të ligës, të paktën për shekullin e 21-të, me 122.

Një numër i pabesueshëm, veçanërisht duke pasur parasysh formatin me 18 skuadra të Bundesligës, ku u luajtën vetëm 34 ndeshje. Harry Kane kontribuoi deri në fund, duke shënuar një tregolësh kundër Këlnit dhe duke arritur 36 gola në 31 paraqitje në ligë.

Rekordi i të gjitha kohërave për gola në 5 ligat kryesore mbahet ende nga Torino, që në sezonin 1947/48 shënoi 125 gola në kampionatin italian, me ndryshimin se luajtën 40 ndeshje në total.