BE: Pavarësia e gjyqësorit në disa vende të bllokut po kërcënohet
Komisionarja për Drejtësi e Bashkimit Evropian, Vera Jourova, tha se pavarësia e gjyqësorit është e kërcënuar në vendet si: Bullgaria, Hungaria, Polonia dhe Rumania dhe paralajmëroi se kjo prirje mund ta dëmtojë besimin midis të gjitha shteteve anëtare të BE-së.
“Sfidat për sundimin e ligjit po rriten në disa vende, në një kohë kur reformat e nevojshme të gjyqësorit po helmohen me debate jashtëzakonisht të politizuara”, tha Jourova në një konferencë për gazetarët në Bruksel.
“Nëse sistemi i drejtësisë thyhet në një vend, ndikimi mund të ndjehet në gjithë BE-në, sepse ne mbështetemi në besimin e ndërsjellë”, tha Jourova.
Të premten, BE-ja publikoi edhe rezultatet e një sondazhi, i cili nxori në pah se shumica e njerëzve në Kroaci, Sllovaki, Bullgari dhe Spanjë e vlerësojnë pavarësinë e gjykatave dhe gjykatësve të tyre si të keqe ose shumë të keqe.
