BE propozon ndalimin e rrjeteve sociale për fëmijët nën 13 vjeç

Komisioni Europian ka propozuar kufizime të reja për përdorimin e rrjeteve sociale nga të miturit, duke parashikuar ndalimin e aksesit për fëmijët nën 13 vjeç dhe kufizime të mëtejshme për moshat 13 deri në 15 vjeç.

Propozimi, i prezantuar nga presidentja e Komisionit Europian, Ursula von der Leyen, në fjalimin e saj për Gjendjen e Bashkimit Europian, është pjesë e “EU Kids Act”, nismës së re europiane për forcimin e mbrojtjes së fëmijëve në mjedisin online.

“Pa rrjete sociale nën moshën 13 vjeç. Pa llogari personale nën moshën 15 vjeç”, deklaroi von der Leyen gjatë fjalimit në Parlamentin Europian në Strasburg.

Sipas propozimit, fëmijët nga 13 deri në 15 vjeç do të mund të përdorin vetëm llogari të kufizuara (“mini accounts”), të krijuara dhe të mbikëqyrura nga prindërit, me funksione të reduktuara dhe kufizime kohore. Për grupmoshën 15–18 vjeç, platformat do të kenë detyrimin të zbatojnë masa të posaçme për një dizajn më të sigurt.

Rregullat e propozuara synojnë gjithashtu të kufizojnë mekanizmat e dizajnit që mund të nxisin përdorimin e vazhdueshëm të platformave, përfshirë scrolling-un pa fund, njoftimet artificiale dhe mekanizma të caktuar shpërblimi. Platformat do të duhet të marrin masa për të parandaluar ekspozimin e të miturve ndaj përmbajtjeve të dëmshme dhe kontaktet e padëshiruara nga persona të panjohur.

Propozimi përfshin edhe masa për videolojërat dhe chatbotët me inteligjencë artificiale, ndërsa për këta të fundit parashikohet që funksionet e tyre për të miturit të jenë të çaktivizuara si parazgjedhje.

Kompanitë teknologjike do të përballen gjithashtu me kërkesa më të forta për verifikimin e moshës së përdoruesve dhe për demonstrimin se shërbimet e tyre janë të sigurta për fëmijët.

Propozimi duhet ende të kalojë nëpër procesin legjislativ të BE-së dhe të negociohet me shtetet anëtare dhe Parlamentin Europian përpara se të bëhet ligj.