Begaj: Drita e shpirtit të Nënë Terezës, burim frymëzimi dhe shërimi për mbarë njerëzimin

Sot kremtohet një nga datat më të rëndësishme për figurën e Nënë Terezës, Anjezë Gonxhe Bojaxhiut, dita kur ajo u shpall shenjtore nga papa Françesku, duke u bërë Shën Tereza e Kalkutës.

Presidenti Bajram Begaj, vlerësoi kontributin e saj humanitar dhe mesazhin që ajo përcolli për dinjitetin njerëzor, dashurinë dhe shpresën.

Përmes një mesazhi në rrjetet sociale, Begaj shkruan se Nënë Terezën ishte “misionarja shqiptare e bamirësisë”, duke theksuar përkushtimin e saj ndaj të varfërve, të pamundurve dhe të sëmurëve.

Sipas tij mesazhi dhe trashëgimia e Shën Nënë Terezës vijojnë të jenë aktuale dhe të shërbejnë si burim frymëzimi për njerëzit në mbarë botën.

“Me shërbimin e saj ndaj të varfërve, të pamundurve dhe të sëmurëve, me besimin te Zoti, Shën Nënë Tereza na ndihmoi të shohim madhështinë e dinjitetit të çdo njeriu dhe të besojmë te dashuria, drejtësia dhe shpresa.

Sot, drita e shpirtit të saj mbetet një burim frymëzimi dhe shërimi për mbarë njerëzimin. Për ne shqiptarët, ajo është një udhëzim dhe një amanet për të qenë pranë atyre që kanë më shumë nevojë”, shkruan ai.