Behgjet Pacolli: Ja çfarë bisedova me kryetarin Basha mbrëmë në shtëpinë time

Politikani dhe biznesmeni kosovar Behgjet Pacolli ka rrëfyer sot se çfarë ka diskutuar mbrëmjen e djeshme me kreun e opozitës shqiptare, Lulzim Bashën, të cilin e kishte ftuar në shtëpinë e tij gjatë vizitës që ai po zhvillon me krerët e qeverisë dhe politikës në Kosovë.

”Kosova ka probleme të mëdha pse i mungojnë institucionet, pse nuk arrin të tërheqë investitorë të huaj, pse nuk ka zhvillim ekonomik, pse i mungon vetëdijësimi i qytetarit për ndryshim. – Këtë i thashë mes të tjerave mikut tim, kryetarit të opozitës së Shqipërisë, Lulzim Basha gjatë një takimi të mërkurën në mbrëmje në shtëpinë time,” – shkruan Pacolli. – ‘Zhvillimi ekonomik është si ndriçimi në një mjedis problematik. Kur nuk ka zhvillim ekonomik, problemet e tjera si mungesa e institucioneve, e demokracisë sikur theksohen, ashtu sikundër nëse do të kishte zhvillim ekonomik, problemet e tjera do të ndiheshin më pak”, – nënvizon ai.

Më tej, ai tregon: “Nga ana e tij, kryetari Basha më njohu me vështirësitë që po kalon Shqipëria, duke konsideruar korrupsionin si problemin më të madh të shoqërive tona. Kryetari Basha më bëri një ekspoze të gjithë zhvillimeve të fundit në politikën e Shqipërisë dhe më përcolli ndjeshmërinë popullore, që sipas tij ”ai po e prek në takime të shumta anembanë vendit”.

E njoha gjithashtu Lulzim Bashën, me mesazhet e shumta të inkurajimit që më vijnë nga qytetarët për t’u kthyer fuqishëm në politikën e Kosovës. Mora prej tij si të gjitha herët e takimeve tona vëllazërore, mbështetjen e tij dhe të Partisë Demokratike që ai udhëheq.

Sot kryetari Basha nis gjithë takimet e tjera në një vizitë zyrtare në Kosovë,” përfundon politikani kosovar.