Belshi kundër hartës së re territoriale, banorët protestojnë ndaj bashkimit me Elbasanin

Kundërshtimet ndaj hartës së re administrativo-territoriale janë shtrirë edhe në Belsh, ku këtë të shtunë banorët kanë dalë në protestë kundër propozimit për bashkimin e bashkisë së tyre me Bashkinë e Elbasanit.

Qytetarët shprehen se kjo reformë rrezikon të dobësojë përfaqësimin lokal dhe të cenojë interesat e komunitetit, duke larguar vendimmarrjen nga banorët e zonës.

Në shenjë kundërshtimi, protestuesit kanë firmosur një peticion, përmes të cilit kërkojnë rishikimin e propozimit për hartën e re administrativo-territoriale.

Banorët kanë paralajmëruar se do të vijojnë protestat dhe se ato mund të përshkallëzohen nëse kërkesat e tyre nuk merren në konsideratë.

Kundërshtimet ndaj reformës territoriale nisën fillimisht në Prrenjas, ku prej disa ditësh banorë të shumtë po protestojnë kundër bashkimit të kësaj bashkie me Librazhdin.

Sipas propozimit të Partisë Socialiste për ndarjen e re administrativo-territoriale, numri i bashkive në qarkun e Elbasanit pritet të reduktohet nga shtatë në katër. Reforma parashikon bashkimin e Bashkisë së Prrenjasit me Librazhdin, ndërsa bashkitë Belsh dhe Cërrik do të bashkoheshin me Bashkinë e Elbasanit.