Berisha për rastin Hyseni: Siguria kombëtare është shembur

Kreu i Partisë Demokratike, Sali Berisha, ka vijuar akuzat ndaj kryeministrit Edi Rama lidhur me çështjen e ish-drejtores së SHISH, Vlora Hyseni, e cila ndodhet nën hetim nga SPAK.

Në fjalën e tij, Berisha e lidhi drejtpërdrejt Hysenin me kryeministrin Rama, duke pretenduar se veprimet e saj në krye të institucionit të inteligjencës janë kryer sipas porosive të tij.

Sipas Berishës, rasti përbën një cenim të rëndë të sigurisë kombëtare dhe të besueshmërisë së Shqipërisë përballë partnerëve ndërkombëtarë.

“Nuk shprehin as dhe qëndrimin më të vogël kritik. Natyrisht, Edi Rama nuk është më kryeministri i Shqipërisë, por është padrino i Shqipërisë. Faktohet në mënyrë përfundimtare si kreu i narkoshtetit të parë dhe të vetëm në Europë. Me superskandalin e Vlora Hysenit, e emëruar jashtë çdo lloj kriteri në pozicionin më të rëndësishëm në raport me sigurinë kombëtare, e cila qëndroi aty si shërbëtore e dy zotërinjve, e Edi Ramës dhe Aleksandër Vuçiçit, u vu e tëra në shërbim të organizatës kriminale.

Nuk ka në historinë e shtetit shqiptar një akt më të rëndë në raport me sigurinë kombëtare. Kjo përbën një akt madhor të asgjësimit të saj dhe të tradhtisë ndaj sigurisë kombëtare. Por, Vlora Hyseni ka zbatuar në çdo veprimtari të saj porositë, urdhrat e Edi Ramës.

Përdorimi i të dhënave sekrete në funksion të karteleve, në funksion të grupit të strukturuar kriminal, është goditje e tmerrshme për sigurinë kombëtare, për besueshmërinë e Shqipërisë te partnerët ndërkombëtarë. Ky është akt i pashmebullt, kanë vjedhur miliarda, por të shembësh sigurinë kombëtare”, tha Berisha.