Bien temperaturat, IHK jep parashikimin e motit për fundjavë

Instituti Hidrometeorologjik i Kosovës bën të ditur se gjatë të shtunës në Kosovë pritet mot pjesërisht i vranët, me intervale të shkurtra me diell.

Në disa pjesë të vendit, sidomos gjatë pjesës së dytë të ditës, priten riga shiu, kryesisht me karakter lokal.

Temperaturat minimale do të lëvizin nga 10 deri në 15°C, ndërsa maksimalet nga 20 deri në 25°C.

Do të fryjë erë nga veriperëndimi, me shpejtësi 1–7 m/s.

Ndërkaq, për të dielën, moti do të jetë kryesisht me diell dhe vranësira të shpërndara, pa reshje të theksuara.

Temperaturat minimale do të lëvizin nga 11 deri në 15°C, ndërsa temperaturat maksimale nga 22 deri në 24°C.

Era do të fryjë nga verilindja, me shpejtësi 1–5 m/s.

Kushtet biometeorologjike:

Të shtunën, ndryshimi i kushteve atmosferike dhe mundësia për reshje lokale mund të ndikojnë në rritjen e ndjeshmërisë së personave meteoropatë.

Të dielën, me përmirësimin e motit dhe rritjen e intervaleve me diell, kushtet biometeorologjike pritet të jenë më të favorshme për shumicën e njerëzve.

Temperaturat relativisht të buta gjatë ditës dhe freskimi gjatë natës do të krijojnë kushte përgjithësisht të përshtatshme për aktivitete në ambient të hapur.

Kushtet agrometeorologjike:

Reshjet e mundshme të së shtunës mund të jenë të dobishme për furnizimin e tokës me lagështi. Megjithatë, karakteri lokal i reshjeve mund të shkaktojë shpërndarje jo të njëtrajtshme të sasisë së ujit.

Të dielën, kushtet më të qëndrueshme dhe temperaturat e përshtatshme do të favorizojnë zhvillimin dhe pjekjen e kulturave bujqësore, si dhe punët në terren. /Telegrafi/