Bilanci i sulmit ndaj aeroportit të Dammam-it rritet në dy të vrarë, operacionet rifillojnë

Bilanci i sulmit të së mërkurës mbrëma ndaj aeroportit ndërkombëtar King Fahd në Dammam, në Arabinë Saudite lindore, u rrit në dy të vrarë dhe tetë të plagosur, njoftoi të enjten Autoriteti i Përgjithshëm i Aviacionit Civil të mbretërisë (GACA), siç njofton Reuters. Të vrarët janë një shtetas saudit dhe një shtetas indian, ndërsa plagosjet e tetë të tjerëve variojnë nga të lehta në serioze.

Në bilancin fillestar të sulmit ndaj aeroportit të qytetit kryesor të naftës në lindje të vendit ishte raportuar një i vrarë dhe tetë të plagosur. GACA tha se dëmet nga sulmi po vlerësohen ende, në bashkëpunim me agjencitë përkatëse të sigurisë.

Operacionet në aeroport kanë rifilluar dhe trafiku ajror është kthyer në normalitet, njoftoi autoriteti. Autoritetet saudite nuk thanë se kush e kreu sulmin, por Huthi-t e Jemenit, të lidhur me Iranin, kishin paralajmëruar këtë muaj linjat ajrore të mos përdorin hapësirën ajrore saudite, teksa kanë intensifikuar sulmet ndaj mbretërisë, eksportuesit më të madh të naftës në botë.