FMN: Lindja e Mesme, Afrika e Veriut dhe Pakistani do të tkurren 1.3 për qind këtë vit nga lufta kundër Iranit

Fondi Monetar Ndërkombëtar parashikon se prodhimi ekonomik i Lindjes së Mesme, Afrikës së Veriut dhe Pakistanit do të tkurret me 1.3 për qind këtë vit, si pasojë e luftës së udhëhequr nga SHBA-ja dhe Izraeli kundër Iranit, siç njofton Reuters. Sipas raportit rajonal të FMN-së, të publikuar të enjten në Dubai, në vitin 2027 pritet një rimëkëmbje e fortë prej 6.6 për qind, por prodhimi i ekonomive të rajonit do të mbetet përgjithësisht nën nivelin e parashikimeve të paraluftës.

Goditja, sipas FMN-së, ka qenë e konsiderueshme por e pabarabartë. Ekonomitë eksportuese të naftës, të prekura drejtpërdrejt nga ndërprerjet e prodhimit të energjisë dhe të transportit detar, janë goditur më rëndë, ndërsa vendet importuese të naftës janë treguar më rezistente, me kërkesën e brendshme të mbështetur nga remitancat dhe flukset e turizmit, kushtet e favorshme financiare dhe reagimet e shpejta të politikave që mbrojnë konsumatorët nga çmimet më të larta të mallrave.

Skenari bazë i FMN-së supozon se konflikti do të zbutet në fillim të vitit 2027 dhe tregtia do të normalizohet gradualisht gjatë vitit, por institucioni thekson se perspektiva mbetet e mbuluar nga një pasiguri “jashtëzakonisht e lartë”. “Rreziqet kryesore rrjedhin nga ndërprerje të mëtejshme të prodhimit të energjisë dhe të rrugëve tregtare, që mund t’i çojnë çmimet e energjisë edhe më lart”, thuhet në deklaratën e FMN-së, ku shtohet se edhe kushtet financiare të jashtme mund të shtrëngohen.

FMN-ja përsëriti edhe mesazhin e dhënë në takimet vjetore të javës së kaluar, duke u bërë thirrje politikëbërësve t’i japin përparësi ruajtjes së stabilitetit të çmimeve dhe qëndrueshmërisë fiskale, pavarësisë së bankave qendrore dhe reformave strukturore për rritjen e produktivitetit dhe krijimin e vendeve të punës. Për Kaukazin dhe Azinë Qendrore, fondi parashikon rritje prej 5.2 për qind në vitin 2026 dhe 5 për qind në vitin 2027, me një ritëm që po moderohet drejt niveleve më të qëndrueshme.