Policia kontrollon shtëpinë e studentit nga Rashka, prokuroria mohon se ai është arrestuar

Inspektorët e Departamentit për Krimin e Teknologjisë së Lartë të Ministrisë së Punëve të Brendshme të Serbisë e përfunduan të enjten kontrollin disaorësh të shtëpisë së studentit Andrej Premović në Rashkë, raporton portali lokal Razglas. Policia kishte mbërritur para shtëpisë rreth orës katër të mëngjesit dhe, sipas të njëjtit burim, sekuestroi kompjuterët dhe pajisjet elektronike të studentit, por nuk e shoqëroi atë në polici.

Sipas Razglas-it, kontrolli u krye me urdhër të Gjykatës së Lartë në Beograd, për shkak të dyshimit se Premovići ka kryer veprën penale të hyrjes së paautorizuar në një kompjuter të mbrojtur, në rrjet kompjuterik dhe në përpunimin elektronik të të dhënave, vepër e parashikuar në nenin 302 të Kodit Penal të Serbisë.

Prokuroria e Lartë Publike e Beogradit (VJT) mohoi ndërkohë pretendimet e avokatit Ivan Ninić, i cili kishte shkruar në rrjetin social X se pjesëtarë të Drejtorisë së Policisë Kriminale kishin nisur një “aksion arrestimi” ndaj studentit, me dyshimin se ai ka krijuar platformën ocisti.net, e cila, sipas Ninićit, numëron më shumë se 32.000 llogari “botësh” të Partisë Përparimtare Serbe (SNS) në rrjetin X. “E dënojmë ashpër këtë publikim të pasaktë, që ka për qëllim përhapjen e dezinformatave”, thuhet në reagimin e prokurorisë, e cila thekson se personi A. P. nuk është arrestuar dhe nuk i është caktuar masa e ndalimit, dhe se publiku do të njoftohet me kohë për rezultatin e procedurës.

Familjarët e studentit i thanë Razglas-it se inspektorët nuk ua treguan urdhrin e kontrollit, ndërsa largimi i tyre nga shtëpia u shoqërua me fishkëllima nga qytetarë të mbledhur të Rashkës, të cilët e kundërshtuan aksionin.

Premovići është student i Fakultetit të Shkencave Kompjuterike (RAF) në Beograd. Vitin e kaluar ai u shpall nxënësi i gjeneratës në Gjimnazin e Rashkës; ka fituar medaljen e artë në Olimpiadën e parë të Sigurisë Kibernetike, të mbajtur në Singapor, si dhe mirënjohjen e Akademisë Serbe të Shkencave dhe Arteve për arritjet gjatë shkollimit, raporton Razglas.

Kontrolli i shtëpisë së studentit u krye tri ditë para zgjedhjeve të parakohshme parlamentare të së dielës, më 25 tetor.