Bilanci i sulmit ndaj kampit në Shabwa rritet në 58 të vrarë, thotë zv/guvernatori i provincës

Bilanci i sulmit të Huthi-ve ndaj kampit stërvitor al-Alam në provincën Shabwa të Jemenit është rritur në 58 të vrarë dhe 200 të plagosur, siç njofton Al Jazeera duke cituar zv/guvernatorin e provincës, Fahad Khalifi. Shifra e re zëvendëson bilancin e mëparshëm zyrtar prej 53 të vrarësh, të njoftuar më herët gjatë ditës nga autoritetet provinciale.

Sulmi u krye mëngjesin e së hënës me tre raketa balistike, të cilat goditën kampin ndërsa rekrutët e rinj të forcave të sigurisë ishin rreshtuar për stërvitje. Spitalet e provincës u mbingarkuan nga numri i të plagosurve, dhe më të rëndët u transferuan në provincat fqinje Hadramaut dhe Aden, siç kanë raportuar më herët agjencitë ndërkombëtare.

Huthi-t e kanë marrë përsipër sulmin, duke thënë se kampi përdorej nga forca të mbështetura nga Arabia Saudite. Zëdhënësi ushtarak i grupit, Yahya Saree, ka paralajmëruar se çdo prani ushtarake e mbështetur nga sauditët do të konsiderohet objektiv legjitim.

Kryetari i Këshillit Presidencial të Jemenit, Rashad al-Alimi, e dënoi sulmin dhe premtoi një përgjigje të fortë, duke thënë se goditja e rekrutëve tregon qasjen e Huthi-ve për të përdorur sulme terroriste kur ndodhen nën presion. Luftimet mes Huthi-ve dhe forcave qeveritare janë përshkallëzuar javët e fundit, ndërsa grupi i mbështetur nga Irani ka avancuar drejt Ngushticës Bab el-Mandeb dhe ka shtuar sulmet ndaj Arabisë Saudite.