Shefi i ushtrisë së Pakistanit, Asim Munir, pritet të martën në Teheran për të ringjallur ndërmjetësimin mes Iranit dhe SHBA-së

Shefi i ushtrisë së Pakistanit, Field Marshal Asim Munir, pritet të mbërrijë të martën në Teheran, në një vizitë që synon të ringjallë ndërmjetësimin mes Iranit dhe Shteteve të Bashkuara, siç njofton Reuters. Lajmi u raportua fillimisht nga agjencia gjysmëzyrtare iraniane Tasnim dhe u konfirmua për Reuters-in edhe nga një zyrtar pakistanez.

Pakistani ka qenë ndërmjetësi kryesor mes Teheranit dhe Uashingtonit që nga nisja e luftës në fund të shkurtit. Pikërisht në Islamabad, SHBA-ja dhe Irani nënshkruan në qershor Memorandumin e Mirëkuptimit që duhej të hapte rrugën e negociatave, por bisedimet më pas ngecën mbi garancitë e sigurisë dhe lirinë e lundrimit në Ngushticën e Hormuzit, siç njofton Reuters.

Vizita e Munir-it vjen në një moment kur kanali diplomatik duket i bllokuar: Teherani këmbëngul se propozimi i tij shtatëditor për ri-hapjen e Hormuzit është ende në tryezë, ndërsa Uashingtoni kërkon që në qendër të bisedimeve të vihet që në fillim programi bërthamor iranian. Munir ka qenë disa herë në Teheran gjatë këtij viti në kuadër të të njëjtit mision ndërmjetësimi.

Islamabadi ka ruajtur kontakte të ngushta me të dyja palët edhe gjatë ditëve të fundit: zv/kryeministri dhe ministri i Jashtëm pakistanez, Ishaq Dar, bisedoi të dielën në telefon veçmas me ministrin e Jashtëm iranian Abbas Araghchi dhe me homologun egjiptian Badr Abdelatty për tensionet rajonale dhe nevojën e dialogut.

Mbetet të shihet nëse vizita e së martës do të sjellë një lëvizje konkrete drejt rifillimit të bisedimeve, apo do të mbetet një tjetër raund kontaktesh pa rezultat, ndërsa Hormuzi vazhdon të jetë pika më e nxehtë e përplasjes mes dy vendeve.