BM- Porsche ndryshon aleancë: nga Volkswagen te Xpeng për objektivat e emetimeve të BE-së

Gjiganti i makinave të shpejta, Porsche, ka vendosur të largohet nga grupi i përbashkët i emetimeve me Volkswagen dhe për vitet 2026–2027 të bashkojë flotën e saj me atë të prodhuesit kinez të makinave elektrike XPeng.

Vendimi lidhet me objektivat e reja të Bashkimit Evropian për reduktimin e emetimeve të CO₂. Sistemi i “pooling” u lejon prodhuesve të llogarisin së bashku emetimet mesatare të flotave të tyre.

Kështu, një kompani me shumë makina elektrike mund të kompensojë një prodhues që shet më shumë automjete me motorë me djegie.

Në këtë rast, Xpeng është një partner i favorshëm për Porsche, pasi gama e saj evropiane është tërësisht elektrike

Ndërkohë, Porsche ka ulur ambiciet për kalimin e shpejtë te makinat elektrike dhe po rikthen vëmendjen te modelet hibride dhe me motor me djegie.

Situata është bërë më e vështirë edhe nga rënia e shitjeve të makinave elektrike të Porsche. Në gjysmën e parë të vitit 2026, shitjet e automjeteve elektrike të markës në Evropë ranë rreth 30% krahasuar me të njëjtën periudhë të vitit 2025.

Marrëveshja me Xpeng pritet t’i ndihmojë Porsche-s të përmbushë objektivat evropiane për CO₂, ndërsa largimi nga “pool”-i i Volkswagen mund të ndihmojë edhe kompaninë mëmë Volkswagen të ulë emetimet mesatare të flotës së saj.