Arrestohet në Podgoricë 39-vjeçari që kërcënoi me revolver punonjësit e një kazinoje

Një 39-vjeçar nga Podgorica është arrestuar sot, i dyshuar se ka kërcënuar me revolver punonjësit e një kazinoje në kryeqytetin malazez, siç njofton Radio Bijelo Polje, duke iu referuar njoftimit të Drejtorisë së Policisë së Malit të Zi. Arrestimin e kryen pjesëtarë të Departamentit të Sigurisë në Podgoricë – Stacioni i policisë për rendin dhe qetësinë publike, me urdhër të prokurorit të shtetit në Prokurorinë Themelore të Shtetit në Podgoricë.

Ngjarja ndodhi sot në mëngjes, rreth orës 06:00, kur një punonjës i sigurimit të kazinosë njoftoi policinë se një burrë, i cili më parë ishte larguar nga objekti nga sigurimi, ishte kthyer në kazino me pistoletë dhe kishte kërcënuar punonjësit. Punonjësit e sigurimit e kishin mbajtur atë derisa mbërriti policia.

Policët gjetën në vendngjarje personin e identifikuar si D.K., 39 vjeç, dhe e shoqëruan në ambientet e Departamentit të Sigurisë në Podgoricë. Atij iu sekuestrua një revolver Smith & Wesson.

I dyshuari ngarkohet me veprat penale rrezikim i sigurisë dhe mbajtje e paligjshme dhe pa leje e armëve dhe lëndëve plasëse, të kryera ndaj punonjësve të kazinosë. Prokurori i shtetit, pasi mori deklarata nga disa persona, urdhëroi arrestimin e D.K.

D.K. do të dërgohet brenda afatit ligjor para prokurorisë kompetente, për procedurë të mëtejshme.