Botërori 2026: SHBA lejon Iranin të mbërrijë dy ditë para ndeshjes së fundit në Seattle

Departamenti i Sigurisë Kombëtare i Shteteve të Bashkuara njoftoi se skuadra e futbollit e Iranit do të lejohet të hyjë në Seattle dy ditë para ndeshjes së tretë në grup ndaj Egjiptit më 26 qershor, por do të detyrohet të kthehet në bazën e saj në Tijuana, Meksikë, të njëjtën ditë pas përfundimit të ndeshjes. Zyrtarët thanë se masat e përgjithshme të sigurisë dhe protokollet mbeten të njëjta.

Sipas bbc, ky ndryshim erdhi pas njoftimit të Federatës Iraniane të Futbollit se do të paraqiste një ankesë zyrtare te FIFA për trajtim të padrejtë në SHBA. Trajneri Amir Ghalenoei ka shprehur se skuadra është dëmtuar në përgatitje, duke thënë se i është hequr një pjesë e konsiderueshme e kohës së stërvitjes dhe duke e përshkruar ekipin si një nga më të shtypurit në turne.

Derisa për dy ndeshjet e para skuadrës iu lejohej të hynte vetëm një ditë para ndeshjes dhe të largohej të njëjtën ditë sipas kushteve të vizave, zyrtarët amerikanë thanë javën e kaluar se ishin duke diskutuar ndryshime për ndeshjen në Seattle. Andrew Giuliani, drejtues i task-forcës së Shtëpisë së Bardhë për Kupën e Botës, argumentoi se kufizimet më të rrepta për dy ndeshjet e para ishin të arsyeshme për shkak të afërsisë së fluturimit nga Tijuana, por se udhëtimi drejt Seattle mund të zgjasë deri në tre orë dhe për këtë arsye po shqyrtoheshin rregullime.

Ghalenoei ka kërkuar vazhdimisht që ekipi të lejohet të mbërrijë në qytetet pritëse dy ditë para ndeshjes dhe të kthehet në bazë ditën pas për të siguruar përgatitje teknike dhe fizike optimale. Në një konferencë për shtyp trajneri tha se skuadra po përballet me sfida jashtë fushës dhe se këto kufizime nuk i shërbejnë turneut, duke theksuar se ekipi është aty për futboll, jo për politikë.

Federata e Futbollit të Iranit deklaroi se kufizimet bien ndesh me parimin e krijimit të kushteve të barabarta për të gjitha skuadrat dhe mund të dëmtojnë proceset e përgatitjes, një qëndrim që federata i tha bbc.