BOTËRORI 2026 – Slaven Biliç rikthehet në krye të Kombëtares së Kroacisë

ZAGREB, 13 korrik /ATSH-DPA/ – Slaven Biliç është emëruar trajneri i ri i Kombëtares së Kroacisë, duke u rikthyer në këtë detyrë pas 14 vitesh.

Biliç, 57-vjeç, i cili kishte drejtuar përfaqësuesen kroate edhe në periudhën 2006–2012, zëvendëson Zlatko Daliç, i cili u largua pas eliminimit të ekipit nga Kupa e Botës.

Kroacia e mbylli fazën e grupeve në vendin e dytë të Grupit L, një pikë pas Anglisë, por u eliminua në raundin e 1/16-ave pas humbjes 2-1 ndaj Portugalisë.

Në një mesazh të publikuar nga Federata Kroate e Futbollit, Biliç shprehu besimin e plotë te skuadra dhe tha se synon ta mbajë Kroacinë mes elitës së futbollit botëror.

“Kam besim të plotë te lojtarët tanë dhe është përgjegjësia ime të sjell energji, ambicie dhe vendosmëri për të siguruar që Kroacia të mbetet mes elitës së futbollit. Jam shumë i lumtur që nis këtë sfidë dhe ndihem më i pjekur e më me përvojë se në vitin 2006, por me të njëjtin motivim dhe dëshirë për ta parë Kroacinë të fortë, të guximshme dhe të suksesshme”, u shpreh Biliç.

Si futbollist, Biliç zhvilloi 44 ndeshje me Kombëtaren e Kroacisë, shënoi tre gola dhe ishte pjesë e skuadrës në Euro 1996 dhe në Kupën e Botës 1998./  /Ad.Ab./ a.jor.