Botuesit dhe reklamuesit i kërkojnë BE-së dhe Britanisë të pezullojnë kushtet e reja tregtare të Meta-s

Reklamuesit dhe botuesit dixhitalë i janë drejtuar të enjten rregullatorëve të Bashkimit Evropian dhe të Britanisë së Madhe me kërkesën për pezullimin e kushteve të reja tregtare të Meta Platforms, të cilat hyjnë në fuqi më 30 tetor, siç njofton Reuters. Sipas tyre, kushtet e reja do t’i jepnin kompanisë të drejtë të pakufizuar për të përdorur përmbajtjen e tyre në shërbimet e inteligjencës artificiale.

Grupi avokues Movement for an Open Web, anëtarët e të cilit janë reklamues dhe botues dixhitalë, tha se është ankuar te Komisioni Evropian dhe tek Autoriteti britanik i Konkurrencës dhe Tregjeve (CMA), duke kërkuar masa të përkohshme ndërhyrjeje, raporton Reuters. Botuesit në mbarë botën po e ashpërsojnë betejën me kompanitë e inteligjencës artificiale që përdorin përmbajtjen e tyre pa leje për trajnimin e modeleve të mëdha gjuhësore.

«Kushtet e reja të Meta-s janë qartësisht antikonkurruese. Shumë biznese praktikisht nuk kanë zgjidhje tjetër veçse të përdorin shërbimet e Meta-s dhe këto kushte do t’i detyronin të heqin dorë nga të drejtat mbi përmbajtjen e tyre dixhitale, pa asnjë mundësi përjashtimi», tha Tim Cowen, bashkëthemelues i Movement for an Open Web, sipas Reuters. Sipas tij, kushtet do t’i jepnin Meta-s dorë të lirë të mbledhë përmbajtje nga pothuajse çdo faqe interneti në botë, potencialisht për t’i përdorur ato të dhëna në shërbime me inteligjencë artificiale që më pas do të konkurronin me vetë ato biznese.

Meta tha se nuk pajtohet me ankesën. «Kushtet e mbledhjes që ne i konsoliduam zbatohen vetëm për produktet tona të reklamave dhe të biznesit dhe këtë e kemi sqaruar në vetë kushtet. Kjo nuk ndryshon mënyrën se si Meta i përdor mbledhësit e uebit», tha një zëdhënës i kompanisë, duke shtuar se pronarët e përmbajtjes mund të përdorin gjithmonë skedarin robots.txt për të sinjalizuar preferencat e tyre dhe se përditësimet nuk kanë të bëjnë me mbledhjen e faqeve të lajmeve e nuk japin të drejta të reja që i tejkalojnë ato preferenca.

Autoriteti britanik CMA tha se u takua me Meta-n të mërkurën për të marrë më shumë detaje mbi kushtet e reja tregtare dhe se po zhvillon bisedime urgjente me kompaninë teksa shqyrton hapat e radhës, ndërsa Komisioni Evropian nuk iu përgjigj menjëherë kërkesave për koment, njofton Reuters. Kritika e Movement for an Open Web vjen pas ankesave të ngjashme të Këshillit Evropian të Botuesve (EPC) javën e kaluar dhe të shoqatave gjermane të botuesve BDZV dhe MVFP në fillim të kësaj jave. Kompanitë që kërkojnë masa të përkohshme duhet të tregojnë se do të pësojnë dëm serioz dhe të pariparueshëm nga praktikat e dyshuara antikonkurruese.