BUDVA – Merz paralajmëron rritjen e aktiviteteve të spiunazhit rus në Gjermani

BUDVA, 22 tetor /ATSH-DPA/ – Kancelari gjerman, Friedrich Merz ka paralajmëruar se rastet e spiunazhit në Gjermani mund të shtohen gjatë muajve dhe viteve të ardhshme, pas arrestimit të një shtetasi ukrainas të dyshuar për spiunazh në favor të Rusisë.

Duke folur sot në Budva të Malit të Zi, në kuadër të samitit të Ballkanit Perëndimor, kancelari Merz e cilësoi arrestimin si një sukses të autoriteteve gjermane, por theksoi se aktivitetet e shërbimeve sekrete ruse në vend mbeten në nivele të larta.

I dyshuari u arrestua në distriktin Oder-Spree, në landin Brandenburg, që rrethon kryeqytetin Berlin.

Sipas Prokurorisë së Përgjithshme Federale në Karlsruhe, ai dyshohet se kishte qenë në kontakt me një shërbim rus të zbulimit përmes një ndërmjetësi, të paktën që nga korriku i vitit 2025.

Autoritetet besojnë se ai ka shfrytëzuar lidhjet e tij në industrinë evropiane të mbrojtjes për të siguruar informacione me rëndësi ushtarake.

Sipas hetuesve, informacionet e kërkuara përfshinin të dhëna mbi prodhimin e tankeve, municioneve dhe eksplozivëve, si dhe mbi personelin dhe instalimet ushtarake në zona të rëndësishme për mbrojtjen e krahut lindor të NATO-s.

Prokuroria bëri të ditur se një pjesë e informacionit ishte e disponueshme publikisht, ndërsa në raste të tjera i dyshuari dyshohet se kishte kontaktuar posaçërisht persona që punojnë në industrinë evropiane të mbrojtjes. /Ad.Ab./ a.jor.